Фермерүүд үр тариандаа бяцхан мэдрэгч суулгаж байна гээд төсөөл дөө. Эдгээр мэдрэгчүүд ургамлын эрүүл мэндийг сайжруулах өгөгдлийг дамжуулах боломжтой. Ургамалд зориулсан мэдрэгчид аль хэдийн туршигдаад эхэлсэн бөгөөд 2023 оны Дэлхийн эдийн засгийн форумын шилдэг шинэ 10 технологийн нэгт багтсан. Жил бүр ДЭФ ирэх гурваас таван жилд дэлхий ертөнцөд эерэг нөлөө үзүүлэх шийдлүүдийг тодорхойлдог. Мэдээж хэрэг энэ нь амаргүй ажил. Гэхдээ энэхүү хөтөлбөр чамгүй үр дүнд хүрсэн. 2011 оны уг жагсаалтад гений инженерчлэл, CRISPR-Cas9 гэх мэт хүмүүсийн төдийлөн мэддэггүй технологиуд багтаж байв. Дөрөвхөн жилийн дараа CRISPR нь Нобелийн шагнал хүртсэн бөгөөд өнөөдөр шавж болон ган гачигт тэсвэртэй үр тарианы төрөл гарган авахад ашиглагдаж байна. ДЭФ-ын 20 улс орны 90 судлаачаас бүрдсэн баг 2023 оны шилдэг 10 технологийг танилцуулж байна.

1. Уян хатан зай

Зай бол технологийн ертөнцийн үнсгэлжин юм. Зай асар их ач холбогдолтой ч төдийлөн үнэлэгддэггүй. Зайны технологид гарах дэвшил нь бидний ажиллаж, хөдөлмөрлөх хийгээд тоглож наадах хэв маягийг бүхэлд нь өөрчлөх боломжтой. Уян хатан зайн тухай арваад жилийн турш ярьж байгаа ч одоог хүртэл олон нийтийн хүртээл болж чадаагүй байна. Гэвч энэ нь ирээдүйд өөрчлөгдөх боломжтой бөгөөд хэд хэдэн төрлийн уян хатан зайг хөгжүүлж байна. Эдгээр нь дамжуулагч полиметр гүйдлийн коллекторт байрлуулсан лити-ион эсвэл цайр-нүүрстөрөгчийн системд суурилдаг. Яагаад энэ технологи ингэж их сэтгэл татна вэ? Уян хатан зай нь эмнэлгийн зүүдэг төхөөрөмж, био-анагаах ухааны мэдрэгч, уян дэлгэц, ухаалаг цагны хөгжлийг хурдасгаж чадахаас гадна дизайны салбарыг хувьсган өөрчлөх боломжтой.

2. Генератив хиймэл оюун ухаан

ДЭФ жагсаалтад багтсан бусад технологиос ялгаатай нь GenAI аль хэдийн олонд танигдсан. 2022 онд OpenAI ChatGPT нээлтээ хийж, хэдхэн долоо хоногийн дотор 100 сая хэрэглэгчтэй болсон билээ. ChatGPT болон бусад ижил төрлийн платформууд текст, компьютерын программчлал, зураг, дуу хөгжим бүтээх чиглэлд ахиц дэвшил гаргаж байгаа бол GenAI нь эм үйлдвэрлэл, архитектур, инженерчлэл гэх мэт ирээдүйд чухал ач холбогдолтой салбарт ажиллаж байна. Жишээлбэл, НАСА-гийн инженерүүд сансрын нислэгт зориулсан тоноглол бүтээх зорилготой хиймэл оюун ухааны системийг туршиж байна. Хиймэл оюун ухаан ашигласнаар судалгаа хөгжүүлэлтийн хугацааг 10 дахин бууруулж чадна гэж тэд үзэж байна. Эрдэмтэд GenAI-ийн тархины үйл ажиллагаанд дүн шинжилгээ хийж, хүний бодлыг зураг хэлбэрээр илэрхийлэх туршилт хийж байгаа нь бүр ч гайхалтай.

3. Тогтвортой агаарын тээврийн түлш

Нүүрсхүчлийн хийг бууруулах хүчин чармайлтын нэг том асуудал нь агаарын тээвэр билээ. Агаарын тээвэр хүн төрөлхтний ялгаруулж буй нүүрсхүчлийн хийн 3%-ийг эзэлдэг ч автомашинаас ялгаатай нь ойрын хугацаанд цахилгаан эрчим хүч рүү шилжих боломжгүй юм. Ялангуяа холын зайн нислэгүүд маш их түлш шатаадаг. Харин одоо боломжит шийдэл бодит болоход ойрхон байна. Агаарын тээврийн тогтвортой түлшийг (SAF) хэрэглээнд оруулахад одоогийн нисэх онгоц болон бусад тоног төхөөрөмжид томоохон өөрчлөлт оруулах шаардлагагүй бөгөөд биомасс, нүүрсхүчил, ногоон устөрөгч, ургамлын тос, амьтны өөх тос гэх мэт олон аргаар гаргаж авах боломжтой. Түүхий эдийг задлахад инженерийн аргаар боловсруулсан бактерийг ихэвчлэн ашигладаг. Өнөөдөр тогтвортой агаарын тээврийн түлш нь дэлхийн онгоцны түлшний хэрэглээний нэг хүрэхгүй хувийг бүрдүүлдэг. Гэвч хэрэглээ нь хурдтай нэмэгдэж байна. Үйлдвэрлэлийн хэмжээ нэг жилийн дотор гурав дахин нэмэгдэж, 2022 онд 300 сая литрт хүрсэн. Их Британи улс АТТТ ашиглан атлантын далай дээгүүр анхны нүүрстөрөгч ялгаруулаагүй нислэг хийхээр бэлтгэж байна.

4. Фаг

Фаг нь бактери руу халдварлаж, түүний дотор үрждэг нэгэн төрлийн вирус юм. Хэрэв бид фагуудыг удирдаж чадвал малын өсөлтийг сайжруулж, ургамлын өвчнийг эмчилж, хүнсний аюултай бактерийг устгах боломжтой. Эрдэмтэд фагийг дахин программчлах синтетик биологийн хэрэгслийг боловсруулж байна. Ингэж нянгийн үйл ажиллагааг өөрчилж, эмчилгээний молекул үүсгэх эсвэл тодорхой эмд мэдрэмтгий болгодог. Фагууд аль хэдийн ажилдаа орсон. АНУ-ын Хүнс ба эмийн агентлаг гэдэсний савханцраар үүсгэгддэг цус задралыг (HUS) эмчлэх фагийн туршилтыг зөвшөөрөөд байна.

5. Сэтгэцийн эрүүл мэндэд зориулсан метаверс

Metaverse нь сүүлийн хэдэн жилийн хугацаанд асар их шуугиан дэгдээсэн ч интернэт худалдаа, энтертайнментаас хэтрээгүй. Харин одоо сэтгэцийн эрүүл мэндийг сайжруулахын тулд виртуал ертөнцийг ашиглах талаар сонирхож байна. Метаверсээр дамжуулан хүмүүс нэг нэгэнтэйгээ холбогдож, сэтгэл заслын явуулах боломжтой гэж үзэж байгаа бөгөөд энэ чиглэлд олон стартап шинээр бий болоод байна. Жишээлбэл TRIPP компанийн бүтээл Mindful Metaverse нь VR-ийн тусламжтайгаар бясалгалын зааж байна.

6. Ургамлын зүүдэг мэдрэгч

Хөдөө аж ахуйд мэдээллийн технологийн хувьсгал өрнөж байна. Тариаланчид үр тарианыхаа эрүүл мэндийг үнэлэх, ургамлын гарцыг сайжруулах, хортон шавж, өвчнөөс урьдчилан сэргийлэхийн тулд алгоритмын шинжилгээг ашиглах болсон. Гэхдээ нарийвчлал муутай хиймэл дагуулын өгөгдөл, мэдрэгчээр тоноглосон дрон зэрэг уламжлалт технологи нь өндөр өртөгтэй, цаг хугацаа шаарддаг сул талтай. Ийм ч учраас ургамал зүүдэг ургамлын мэдрэгчүүд олны сонирхлыг ихээхэн татаж байгаа юм. Энэхүү бичил төхөөрөмжүүдийг ургамалд бэхэлснээр нь температур, чийгшил, шим тэжээлийн түвшнийг тасралтгүй хянах боломжтой.

Гэхдээ мэдээж хэрэг сорилт бий. Уг мэдрэгчийг суурилуулах болон засвар үйлчилгээ хийхэд маш их цаг зарцуулдаг. Гэвч НҮБ-ын Хүнс, хөдөө аж ахуйн байгууллагаас 2050 он гэхэд дэлхийн нийтийг тэжээхийн тулд хүнсний үйлдвэрлэл 70 хувиар өсөх ёстой гэсэн дүгнэлт танилцуулсан. Ийм ч учраас хөдөө аж ахуйн салбар дахь технологийн шийдэл бүр нийтийн анхаарлыг татаж байна.

7. Орон зайн омикс

Хүний биед 37.2 их наяд эс байдаг. Тэд биднийг хэрхэн амьд, эрүүл байлгадаг вэ? Энэ асуултад орон зайн омикс хариулах боломжтой. Орон зайн омикс гэж юу вэ? Эрдэмтэд эрхтэнийг зөвхөн нэг эсийн зузаантай хувааж, дараа нь зүсэм бүрийн тодорхой биомолекулуудын байршлыг дүрслэн харуулахын тулд орон зайн омиксийг ашигладаг. Энэ нь эсийн бүтцийг урьд өмнө хэзээ ч харж байгаагүйгээр нарийвчлах боломжийг олгодог. Эрдэмтэд туршилтаар хулганын гэмтсэн нугасны мэдрэлийн эсийн хэсгийг тодорхойлж, эдгэрэлтийг түргэсгэж чадсан. Хавдар, Альцхеймер, үе мөчний артерийн судасны өвчлөлийг болон өөр бусад олон өвчнийг эмчлэх боломжтой.

8. Уян хатан мэдрэлийн электрон төхөөрөмж

Тархи хэмээх машины бүтэц уран зөгнөлт зохиолыг санагдуулдаг. Тэгвэл энэ машиныг бид өөрсдийн хүссэнээрээ удирдана гэдэг үнэхээрийн гайхалтай хэрэг. Энэ чиглэлд аль хэдийн ихээхэн ахиц дэвшил гараад эхэлжээ. Тархины компьютерын интерфейстэй (BMI) төстэй системийг унаж татах өвчний эмчилгээ болон хиймэл эрхтийг удирдахад ашиглаад эхэлсэн. Энэ чиглэлд удаан хугацаанд оршиж буй асуудал нь суулгац өөрөө юм. Суулгацууд нь хатуу материалаар хийгддэг, нугалах боломжгүй учраас тархины хөдөлгөөнд саад учруулдаг. Уян хатан био материал сонирхол татаж, зөнөх, аутизм зэрэг мэдрэлийн эмгэгийг арилгах боломжтой гэж найдаж байна.

9. Тогтвортой компьютер тооцоолол

Бид ТВ, цахим шуудан, сошиал медиа гэх мэтчилэн үүлэн технологид суурилсан эрин үед амьдарч байна. Эдгээр үйлчилгээ нь хүн төрөлхтний нийт цахилгаан эрчим хүчний 1%-ийг хэрэглэдэг дата төвүүдээр дамжин хүрдэг. Тэгвэл энэ хэрэглээг бид бууруулж чадах уу? Үүнийг шийдэх хэд хэдэн арга зам бий. Жишээлбэл, Стокгольм хот дата төвүүдээс ялгаруулдаг дулааныг халаалтын системдээ ашиглаж байна. Үүний зэрэгцээ Google нь дата төвүүдийнхээ эрчим хүчний хэрэглээг 40 хувиар бууруулахын тулд хиймэл оюун ухаанаар ажилладаг эрчим хүчний менежментийг ашиглаж байна.

10. Хиймэл оюун ухааны тусламжтай эрүүл мэндийн үйлчилгээ

Сая сая хүмүүсийн хувьд эрүүл мэндийн үйлчилгээний нэг том саад нь зохион байгуулалт юм. Эмнэлгүүд нөөцөө үр ашигтай хуваарилж чадахгүйгээс хүлээлгэ, дараалал үүсэх нь элбэг. Асар их хэмжээний “эмх замбараагүй” өгөгдлийг ангилах нь хиймэл оюун ухааны хамгийн сайн чаддаг зүйл. Тиймээс одоо хиймэл оюун ухаан эрүүл мэндийн үйлчилгээг эрс сайжруулах боломжтой гэж үзэж байна. Канадын Medical Confidence компани өвчтөний хүлээлгийн хугацааг хэдэн сараас долоо хоног болгон бууруулж чадсан. Хиймэл оюун ухаанд суурилсан эрүүл мэндийн үйлчилгээний үр нөлөө хөгжиж буй орнуудад хамгийн чухал байх болно.

Биткойн болон өөр олон арван койн гэх мэтээр мөнгөний шинэ төрлүүдтэй бид хэдийн танилцсан. Тэгвэл сүүлийн үед хувийн компаниуд тогтвортой байлгахын тулд албан ёсны валюттай уясан өөрсдийн гэсэн цахим мөнгийг гаргах болсон мөнгөний бас нэгэн шинэ төрөл болж байна.

Тогтвортой койны олны мэдэх жишээ нь Фейсбүүкийн эцэг компани Метагийн Дием дижитал мөнгөний төсөл юм. Эцэстээ энэхүү төсөл цуцлагдсан ч тусгаар улс орны удирдлагаас ангид “хувийн” мөнгөний шинэ хэлбэрийн боломжийг дэлхий даяар түгэн дэлгэрүүлсэн билээ. Улам бүр хэрэглээнээс шахагдаж буй бэлэн мөнгөний орыг тэгвэл юу залган авах вэ? Нэг боломж нь виртуал дэвсгэрт. Энэ тохиолдолд төв банк дижитал токен хэлбэрээр албан ёсны валют гаргаж, иргэд дижитал хэтэвчээр дамжуулан ашиглах. Үүнийг төв банкны дижитал мөнгө (ТБДМ) буюу central bank digital currency (CDBC) гэж нэрлэдэг. ТБДМ-ийг цаасан дэвсгэртийн адил зөвхөн төв банк гаргаж, хянана. Эдийн засагчид ТБДМ-ийг олон давуу талтай гэж үзэж байна. Үүнд:

• Эдийн засгийг хянах.

Онолын хувьд ТБДМ-ийг гаргаснаар төв банк бэлэн мөнгө улам бүр шахагдаж буй энэ үед улс орны санхүүгийн дэд бүтцийг хянах боломжтой болох юм. Жишээлбэл, Бахам улс байгалийн гамшгаас учирсан хохирлыг даван туулахын тулд элсэн доллар хэмээн нэрлэсэн дижитал мөнгийг өнгөрсөн онд танилцуулсан. Бахамын эрх баригчид байгалийн гамшигт өртөмхий улсынхаа эдийн засгийг ТБДМ-ийн ачаар эргүүлэн идэвхжүүлнэ гэдэгт итгэж байна.

• Программчлалын боломж

Цаасан дэвсгэртийг “мангар” гэж хэлж болно. Харин эсрэгээрээ дижитал дэвсгэртийг программчлах боломжтой. Өөрөөр хэлбэл, төв банк тодорхой дүрэм, хязгаарлалтыг дижитал дэвсгэртэд программчлан суулгах боломжтой. Жишээлбэл, хүчинтэй хугацаа эсвэл зөвхөн тодорхой төрлийн бараа бүтээгдэхүүн худалдан авах боломж гэх мэт. Ингэснээр засгийн газар нийгмийн халамж шаардлагатай иргэдэд тусгайлан чиглэсэн хөтөлбөр хэрэгжүүлэх эсвэл эдийн засгийг хянаж бас идэвхжүүлэх боломжтой.

• Зардал хэмнэлт

Мөнгийг цахимжуулах нь зардлыг бууруулж, мөнгөний эргэлтийг хурдасгах боломжтой. Жишээлбэл, улс орнуудын хоорондох төлбөр тооцоо эдүгээ ч цаг шаардсан, зардал өндөртэй байна. Судлаачид ТБДМ энэ асуудлыг шийдэж чадна гэж үзэж байна. JP Morgan-ий хийсэн судалгаагаар ТБДМ сүлжээ бий болсноор компаниуд жилд нийт 100 тэрбум ам.доллартай тэнцэх хэмжээний мөнгөн гүйлгээний шимтгэлийг хэмнэж чадах аж.

• Мөнгө угаалт, залилан, хууль бус хөдөлмөрийг бууруулна.

ТБДМ санхүүгийн гэмт хэргийг үлэмж бууруулах боломжтой. Дижитал мөнгө нь бүх л гүйлгээний түүхээ хадгалах боломжтой учраас төв банк мөнгөний урсгалыг хянаж, татвараас зайлсхийх, мөнгө угаах зэрэг гэмт хэргээс сэргийлэх боломжтой. БНХАУ дижитал юанийн төслийн тусламжтайгаар мөнгө угаах гэмт хэрэгтэй амжилттай тэмцэж байна.

• Санхүүгийн хүртээмжийг сайжруулна.

ТБДМ-д тулгуурласан систем нэвтэрснээр иргэд заавал банканд очиж данс нээлгэлгүйгээр ТБДМ ашиглах боломжтой болж, санхүүгийн үйлчилгээний хүртээмж нэмэгдэнэ. Бэлэн мөнгө дижитал болж хувирснаар мөнгийг хадгалах (банканд данс нээлгүйгээр), зээл авах болон бусад санхүүгийн бүтээгдэхүүн худалдан авахад илүү хялбар болно. Жишээлбэл Ямайка улс ТБДМ бий болгож байгаа нэг гол зорилго нь энэ. Ямайкийн төв банкны орлогч захирал Натали Хэйнес “Ямайкчуудын дийлэнх хэсэг нь санхүүгийн үйлчилгээ хүртэж чаддаггүй. Эдгээр иргэдийг албан ёсны санхүүгийн системд хамруулахын тулд төв банк дижитал дэвсгэрт гаргахаар шийдсэн” хэмээн мэдэгдсэн.

Энэхүү санхүүгийн хүртээмжийн асуудал нь засгийн газар болон төв банкуудын хувьд хамгийн чухал хүчин зүйл юм. Гэвч хоёр асуудлыг шийдэх ёстой. Нэгдүгээрт, банканд мөнгөө хадгалдаггүй иргэдийн хувьд хэрхэн дижитал мөнгийг ашиглах вэ? Хоёрдугаарт, интернет эсвэл цахилгаан сүлжээнд холбогдоогүй иргэд хэрхэн ТБДМ ашиглах вэ? Энэхүү хоёр тулгамдсан асуудлыг шийдэж чадвал дэлхийн санхүүгийн тогтолцоонд нэгэн хувьсал гарахад бэлэн болжээ. Монгол Улс дижитал төгрөгтэй болоход бэлэн үү?

Холбооны нөөцийн банкны ТУЗ-ийн гишүүн асан Бен Бернанке 2014 онд зээл авах хүсэлт гаргасан ч түүний хүсэлт буцаагджээ. 2.3 сая ам.долларын хөрөнгөтэй хүний хувьд энэ нь ихээхэн хачирхалтай явдал. Асуудлын гол нь Бернанке зээлийн хүсэлтийн маягт дах ажил мэргэжил гэсэн хэсгийг чөлөөт уран бүтээлч хэмээн бөглөжээ. АНУ-ын зээлийн зэрэглэл тогтоох агентлагуудын хувьд чөлөөт уран бүтээлч нь өндөр эрсдэлтэй бүлэгт багтдаг.

Барнанкегийн түүх 1950-иад онд бий болсон зээлийн зэрэглэлийн тогтолцооны хязгаарыг бидэнд харуулж байна. Ийм алдаатай систем төлбөрийн чадвартай олон зээлийн хүсэлт гаргагчийг буцааж, санхүүгийн байгууллагуудын боломжит орлогыг хумсалж байгаа. Өнөөдөр технологийн салбарт гарсан томоохон дэвшлүүдийн ачаар илүү их өгөгдөл ашиглан тухайн иргэний зээлжих зэрэглэлийг тодорхойлох боломжтой болсон.

Технологийн салбарын дэвшил гэдэг нь гарцаагүй хиймэл оюун ухаан. Хиймэл оюун ухаан хэдэн сая өгөгдлийг шинжлэх судалж, хэн сайн зээлдэгч, хэн муу зээлдэгч байж болохыг тодорхойлж чадна. Upstart, Zest Finance зэрэг компаниуд хиймэл оюун ухаанд суурилан зээл олгож байна. Гэхдээ хиймэл оюун ухааны санхүүгийн салбарт үзүүлэх нөлөө нь зөвхөн зээлжих зэрэглэлээр хязгаарлагдахгүй. Үүнд:

• Цахим баталгаажуулалтыг сайжруулна
• Санхүүгийн гэмт хэрэгтэй тэмцэнэ
• Санхүүгийн бүтээгдэхүүнийг хувьд хүнд зориулан загварчилна
• Хэрэглэгчийн үйлчилгээг сайжруулна
• Бичиг баримтыг уншина.

Дээр дурдсан жишээ нь айсуй их давлагааны ердөө л өнгөн хэсэг билээ. Хиймэл оюун ухаанд суурилсан финтехийн зах зээл 2030 он гэхэд 40 тэрбум ам.долларт хүрнэ гэж Grand View Research төв таамаглаж байна.

Өнгөрсөн онд нээлтээ хийсэн ChatGPT хоёрхон сарын дотор 100 сая хэрэглэгчийг татаж чадсан. Харин Инстаграм ийм амжилтад хүрэхийн тулд 2 жилийг зарцуулсан билээ. ChatGPT онигоо ярьж, нийтлэл, шүлэг бичиж чадна. Гэхдээ энэ бол энгийн хэрэглэгчдийн л харж буй үр дүн. Тэгвэл Generative AI буюу бүтээгч хиймэл оюун ухаан үүнээс ч хавь илүү ихийг хийж чадна. Голдман Сакс компанийн судалгаагаар хиймэл оюун ухаан ирэх 10 жилд дэлхийн ДНБ хэмжээг 7 хувиар нэмэгдүүлэх гэнэ. Энэ нь 7 их наяд ам.доллартой тэнцэнэ.

Хиймэл оюун ухаан санхүүгийн салбарт юу хийж чадах вэ?

1. Хэрэглэгчидийн хөтөч

Олон банк аль хэдийнээ хиймэл оюун ухаанд суурилсан ботын тусламжтайгаар хэрэглэгчидийн асуултад хариулж, бүтээгдэхүүн үйлчилгээгээ танилцуулах болжээ. Яриа таних технологи энэ талбарын бүтээмжийг улам ч нэмж байна. Хэрэглэгчид асуудлаа бичих биш ярих болсноор цаг хугацаа хэмнэж, сэтгэл ханамж нь дээшилдгээс гадна цахим үйлчилгээнд төдийлөн итгэлгүй хэрэглэгчдийн итгэлийг нэмдэг байна.

2. Сэтгэл хөдлөлийн шинжилгээ

Хэрэглэгч ууртай байна уу? Хиймэл оюун ухаанд суурилсан ботууд энэ асуултад хариулж чадна. Хариулахаас гадна уурлаж бухимдсан хэрэглэгчийг тайвшруулах хариу үйлдэл үзүүлж чаддаг.

3. Алдаа илрүүлэх

Хиймэл оюун ухаан асар их хэмжээтэй өгөгдлийг уншиж, уншсан зүйлийнхээ ерөнхий дүр зургийг гаргаж чаддаг. Ингэснээр санхүүгийн систем дэх ямар нэг ер бусын үйл ажиллагааг буюу залилан, гэмт хэргийн шинжтэй үйлдлийг илрүүлэх боломжтой.

4. Хэрэглэгч бүрд зориулан загварчилсан бүтээгдэхүүн үйлчилгээ

Санхүүгийн үйлчилгээ үзүүлэгчдийн хамгийн том мөрөөдөл нь хэрэглэгч бүрийнхээ хэрэгцээ шаардлагад нийцсэн бүтээгдэхүүн үйлчилгээ хүргэх юм. Тэгвэл хиймэл оюун ухааны тусламжтайгаар энэ боломж нээгдэж байна. Хиймэл оюун ухаан хэрэглэгч бүрийн түүх, зан авир, зайлсхийдэг эрсдэл зэргийг судалж, түүнд зориулсан хөрөнгө оруулалт, хадгаламж, зээлийн үйлчилгээ санал болгох чадвартай.

5. Бичиг баримт цэгцлэх

Банкны гэсэн хаягны ардах асар их цаг зав шаардсан арын ажлыг хиймэл оюун ухаан хөнгөвчилнө. Банк бүр бүтцэд оруулсан болон оруулаагүй асар их хэмжээний архивтай. Өмнө нь хэрэгтэй мэдээллээ олж авахын тулд ажилтнууд энэ их бичиг баримт дотор сэлэхээс өөр аргагүй болдог байсан. Харин одоо энэ ажлыг хиймэл оюун ухаан хавьгүй хурдан хийх боломжтой боллоо. Тэр зөвхөн бичиг баримт цэгцлээд зогсохгүй тайлан бичиж ч чадна.

6. Дүрс таних

Санхүүгийн үйлчилгээ үзүүлэгчид дүрс болон видеотой тогтмол ажилладаг. Жишээлбэл, даатгалын компанийн нэхэмжлэлийн эсвэл банк иргэний мэдээллийг шалгах процессыг нэрлэж болно. Тэгвэл одоо эдгээр ажлыг хиймэл оюун ухаанд даатгах боломжтой боллоо.